வேளச்சேரி அடுத்த ஆதம்பாக்கம் பகுதியில் உள்ள ராமகிருஷ்ணா நகர் இரண்டாவது பிரதான சாலையில் இன்று அதிகாலை ஒரு வீட்டில் திடீரென தீ விபத்து ஏற்பட்டது. இந்த தீயில் அந்த வீட்டில் வசித்த மருத்துவர் ஆனந்த் அவர்களின் மனைவி சசிபாலா உயிரிழந்துள்ளார்.
அந்த வீட்டின் முதல் மாடியில் மருத்துவர் ஆனந்த், அவரது மனைவி சசிபாலா, மகள், மகன் ஆகிய நால்வரும் வசித்து வந்தனர். நேற்று இரவு அனைவரும் வீட்டில் உறங்கிக் கொண்டிருந்த நிலையில், இன்று அதிகாலை சுமார் 4.20 மணியளவில் திடீரென வீட்டின் ஹாலில் தீ பரவத் தொடங்கியது.
தீ மிக வேகமாக பரவியதால், வீட்டில் கருப்பு புகை சூழ்ந்தது. அச்சமடைந்த குடும்பத்தினர் வெளியே வர முயன்றும், புகை காரணமாக வெளியேற முடியவில்லை.
இதைக் கண்ட அக்கம் பக்கத்தினர் தண்ணீர் ஊற்றி தீயை அணைக்க முயன்றனர், ஆனால் அது பலனளிக்கவில்லை. உடனடியாக தீயணைப்பு துறைக்கு தகவல் அளிக்கப்பட்டது.
தீயணைப்பு வீரர்கள் விரைந்து வந்து தீயை கட்டுப்படுத்த முயன்றனர். ஆனால் வீட்டின் முக்கிய கதவு பூட்டப்பட்டிருந்ததால், உள்ளே செல்ல முடியவில்லை. பின்னர் கதவை உடைத்து உள்ளே நுழைந்தபோது, ஹாலில் சசிபாலா தீக்காயங்களுடன் மயங்கிய நிலையில் கிடந்தார். அவரை காப்பாற்ற முயன்றபோதும், அவர் ஏற்கனவே உயிரிழந்திருந்தது உறுதி செய்யப்பட்டது.
மற்ற மூவரும் — ஆனந்த், மகன், மகள் — தீயிலிருந்து தப்பிக்க வீட்டின் ஒரு அறைக்குள் சென்று, அங்கிருந்து குளியலறைக்குள் புகுந்து கதவை உள்ளே பூட்டிக் கொண்டனர். தீ கொழுந்து விட்டுக் கொண்டிருந்ததால், அவர்களை நேரடியாக மீட்பது கடினமாக இருந்தது.
தீயணைப்பு வீரர்கள் குளியலறை ஜன்னலை உடைத்து, வெளியே இருந்து உள்ளே நுழைந்து, ஏணிகள் மூலமாக அந்த மூவரையும் பாதுகாப்பாக மீட்டனர்.
சுமார் ஒரு மணி நேர போராட்டத்துக்குப் பிறகு தீயை கட்டுப்படுத்தினர். இந்த தீ விபத்தால் வீட்டின் ஹால் மற்றும் இரண்டு அறைகள் தீக்கிரையாகியுள்ளன.
மூன்று பேர் புகையால் மூச்சுத் திணறல் அடைந்த நிலையில் மருத்துவமனைக்கு அனுப்பப்பட்டனர். சசிபாலாவின் உடல் மீட்கப்பட்டு உடற்கூறாய்வுக்காக அனுப்பப்பட்டுள்ளது.
இந்த சம்பவம் குறித்து ஆதம்பாக்கம் காவல்துறையினர் விசாரணை நடத்தி வருகின்றனர். ஆரம்பக்கட்ட விசாரணையில், ஷார்ட் சர்க்யூட் அல்லது மொபைல் சார்ஜர் மூலம் மின்கசிவு ஏற்பட்டிருக்கலாம் எனக் கருதப்படுகிறது.
இந்த தீ விபத்து ஆதம்பாக்கம் பகுதியில் பெரும் பரபரப்பை ஏற்படுத்தியுள்ளது.
