ரஷ்யா–யுக்ரைன் இடையிலான போர் இன்று 1425-ஆவது நாளாக தொடர்ந்து நடைபெற்று வருகிறது. 1425 நாட்களாக இடைவிடாது நீடிக்கும் இந்த போரின் காரணமாக, தற்போது யுக்ரைன் நாடு முழுவதும் இருளில் மூழ்கியுள்ளது.
யுக்ரைன் முழுவதும் மின்சாரம் துண்டிக்கப்பட்ட நிலையில், நாட்டின் சுமார் 70 சதவீத பகுதிகள் முற்றிலும் இருண்டு போயுள்ளன. இரவு நேரங்களில் முழுமையான மின்தடை அமல்படுத்தப்பட்டுள்ளதால், மக்கள் கடுமையாக பாதிக்கப்பட்டுள்ளனர்.
மீதமுள்ள 30 சதவீத பகுதிகளில் மட்டும் அணு உலைகளின் மூலம் ஓரளவு மின்சாரம் வழங்கப்பட்டு வருகிறது. மற்ற அனைத்து பகுதிகளிலும் மின்சாரம் இல்லாத சூழ்நிலையே நிலவுகிறது. யுக்ரைனிலிருந்து கிடைக்கும் நேரடி காட்சிகள், அந்த நாடு முழுவதும் இருண்டு போயிருப்பதை உறுதிப்படுத்துகின்றன.
இந்த நிலைமைக்கு முக்கிய காரணம் ரஷ்யாவின் திட்டமிட்ட அதிரடி தாக்குதல்களாகும். யுக்ரைனின் மின்சார உற்பத்தி நிலையங்கள், அணு உலைகள் மற்றும் முக்கிய மின் கட்டமைப்புகளை குறிவைத்து ரஷ்யா தாக்குதல் நடத்தியதால், மின் உற்பத்தி முற்றிலும் பாதிக்கப்பட்டுள்ளது. இதனால் யுக்ரைன் தற்போது மிகக் கடுமையான நெருக்கடியில் சிக்கியுள்ளது.
இந்த சூழ்நிலையில், அருகிலுள்ள ஐரோப்பிய நாடுகளிடம் இருந்து அவசரமாக மின்சாரம் வழங்க வேண்டும் என யுக்ரைன் கோரிக்கை விடுத்துள்ளது. யுக்ரைனுக்கு 18 ஜிகாவாட் மின்சாரம் தேவைப்படும் நிலையில், தற்போது 4 ஜிகாவாட் மின்சாரம் மட்டுமே கிடைக்கிறது. உடனடியாக மின்சாரம் வழங்க வேண்டும் என யுக்ரைன் கெஞ்சும் நிலை உருவாகியுள்ளது.
தற்போது டீசல் மற்றும் பெட்ரோல் மூலம் இயங்கும் ஜெனரேட்டர்கள் கொண்டு வந்து அவசர மின்சாரம் உற்பத்தி செய்யப்படும் காட்சிகள் வெளியாகியுள்ளன. இதனுடன், யுக்ரைனில் கடுமையான குளிர்காலமும் நிலவுகிறது. வெப்பநிலை மைனஸ் 20 டிகிரி செல்சியஸ் வரை குறைந்துள்ளது. இவ்வளவு கடுமையான பனிப்பொழிவில், மக்கள் மிகுந்த சிரமத்துடன் வாழ்க்கையை நடத்தி வருகின்றனர்.
யுக்ரைன் முழுவதும் வாழ்க்கை ஸ்தம்பித்த நிலையில் உள்ளது. கடும் குளிர் காரணமாக வெளியே நடமாட முடியாத சூழல் உருவாகியுள்ளது. இந்த குளிர்காலத்தில் ராணுவத்தினரும் பொதுமக்களும் பெரிதும் அவதிப்பட்டு வருகின்றனர். மின்சாரம் இல்லாததால் ஹீட்டர்கள் பயன்படுத்த முடியாமல், மக்கள் கடுமையான சூழ்நிலையை எதிர்கொண்டு வருகின்றனர்.
கடந்த 24 மணி நேரத்தில் மட்டும் ரஷ்யாவின் ஏவுகணை மற்றும் ட்ரோன் தாக்குதல்களில் 1305 யுக்ரைன் வீரர்கள் உயிரிழந்துள்ளதாக தகவல்கள் வெளியாகியுள்ளன. இது பெரும் அதிர்ச்சியை ஏற்படுத்தியுள்ளது.
இந்த நிலையில், வரும் பிப்ரவரி 22-ஆம் தேதி இந்த போர் நான்கு ஆண்டுகளை நிறைவு செய்ய உள்ளது. 2022 பிப்ரவரி மாதத்தில் தொடங்கிய இந்த தாக்குதல், தற்போது ஐந்தாம் ஆண்டுக்குள் அடியெடுத்து வைக்க உள்ளது. இதற்குள் அமைதி பேச்சுவார்த்தை மூலம் போர் நிறுத்தம் கொண்டு வர வேண்டும் என்ற முயற்சிகள் தீவிரமடைந்துள்ளன.
யுக்ரைன் அதிபர் ஜெலன்ஸ்கி தலைமையிலான குழு, சுவிட்சர்லாந்தின் தாவோஸ் நகரில் நடைபெற உள்ள உலக பொருளாதார மாநாட்டில் பங்கேற்க சென்றுள்ளது. அந்த மாநாட்டில் அமெரிக்க அதிபர் டொனால்ட் ட்ரம்ப் உள்ளிட்ட பல்வேறு நாடுகளின் தலைவர்கள் கலந்து கொள்ள உள்ளனர். அவர்களின் மூலம் அமைதி பேச்சுவார்த்தை நடத்தி போர் நிறுத்த ஒப்பந்தத்தை ஏற்படுத்த முயற்சி மேற்கொள்ளப்படுகிறது.
ஆனால் ரஷ்ய அதிபர் புட்டின், யுக்ரைன் தங்களின் நிபந்தனைகளுக்கு உடன்பட்டால் மட்டுமே போர் நிறுத்தம் சாத்தியம்; இல்லையெனில் தாக்குதல் தொடரும் என்று தெளிவாக கூறியுள்ளார். டொனால்ட் ட்ரம்பும், இந்த போரை முடிவுக்கு கொண்டு வர முடியாமல் யுக்ரைன் அதிபர் ஜெலன்ஸ்கி தடையாக உள்ளார் என கருத்து தெரிவித்துள்ளார்.
இதற்கிடையில், யுக்ரைனும் ரஷ்யாவுக்கு கடுமையான பதிலடி கொடுத்து வருகிறது. யுக்ரைன் ராணுவம் வெளியிட்டுள்ள அறிக்கையில், கடந்த நான்கு ஆண்டுகளில் ரஷ்யாவில் 12 லட்சத்து 25 ஆயிரத்து 590 பேர் உயிரிழந்துள்ளதாக கூறப்பட்டுள்ளது. மேலும், 11,569 டேங்குகள், 434 விமானங்கள், 347 ஹெலிகாப்டர்கள், 28 கடற்படை கப்பல்கள் மற்றும் 18,605 ட்ரோன்களை அழித்ததாகவும் யுக்ரைன் தெரிவித்துள்ளது. இது ரஷ்யாவுக்கு ஏற்பட்ட மிகப்பெரிய இழப்பாக கருதப்படுகிறது.
இதனால், யுக்ரைனும் சம பலத்துடன் தாக்குதலை மேற்கொண்டு வருவது உறுதியாகிறது. இந்த இரண்டு நாடுகளின் போரால் உலகளாவிய அளவில் பெரும் பாதிப்பு ஏற்பட்டுள்ளது.
தலைநகர் கீவ், இரண்டாவது பெரிய நகரமான கார்கிவ் மற்றும் துறைமுக நகரமான ஒடிசா ஆகிய நகரங்கள் கடும் குளிர் மற்றும் மின்தடையால் மிகுந்த பாதிப்பை சந்தித்துள்ளன. நேற்று மட்டும் 167 இடங்களில் தாக்குதல் நடைபெற்றுள்ளதாக தகவல்கள் தெரிவிக்கின்றன.
தற்போது ரஷ்யா, யுக்ரைன் எல்லைக்குள் சுமார் 150 கிலோமீட்டர் வரை முன்னேறி பல பகுதிகளை கைப்பற்றியுள்ளது. ஏற்கனவே கிரிமியா தீபகற்பம், டொனெட்ஸ்க், லுகான்ஸ்க், கெர்சன், சபோரிஜியா உள்ளிட்ட பகுதிகள் ரஷ்ய கட்டுப்பாட்டில் உள்ளன. மேலும் புதிய பகுதிகளும் கைப்பற்றப்பட்டுள்ளதால், யுக்ரைன் கடுமையாக பாதிக்கப்பட்டுள்ளது. இந்த தகவலை சர்வதேச செய்தி நிறுவனம் ராய்டர்ஸும் உறுதிப்படுத்தியுள்ளது.
இந்த நிலையில், யுக்ரைன் மீது தாக்குதல் தொடர்ந்தாலும், அதே நேரத்தில் ரஷ்யாவுக்கும் பெரும் சேதம் ஏற்பட்டுள்ளது என்பது தெளிவாகிறது. எது எப்படி இருந்தாலும், யுக்ரைனில் போர் நிறுத்தம் ஏற்பட்டால் உலகளவில் நன்மை ஏற்படும் என்பதே பலரின் கருத்தாக உள்ளது.
உலக அளவில் பாதிப்பை ஏற்படுத்தி வரும் இந்த பிரச்சினைக்கு அமெரிக்க அதிபர் டொனால்ட் ட்ரம்ப் தீர்வு காண்பாரா? புட்டினுடன் பேச்சுவார்த்தை நடத்தி சமரச உடன்பாட்டை உருவாக்குவாரா? ஜெலன்ஸ்கியின் அடுத்த நடவடிக்கை என்ன? என்ற பல கேள்விகள் எழுந்துள்ளன. வரும் இரண்டு அல்லது மூன்று நாட்களில் ரஷ்யா–யுக்ரைன் போரில் ஒரு முக்கிய திருப்பம் ஏற்படும் என்ற எதிர்பார்ப்பு தற்போது நிலவுகிறது.
