3 லட்சம் ரூபாய் மோசடி செய்த விவகாரத்தில் சினிமா துணை நடிகர் ஒருவர் கைது செய்யப்பட்டுள்ளார். நெல்லை மாவட்டம் பனகுடி அருகே உள்ள தண்டர்குளத்தைச் சேர்ந்தவர் கருணாநிதி. இவர் 2002ஆம் ஆண்டு சென்னையில் சினிமா துறையில் கேண்டீன் சப்ளையராக வேலை பார்த்து வந்தவர். அப்போது சினிமாவில் துணை நடிகராக இருந்த தினேஷ் என்பவருடன் இவருக்கு நட்பு ஏற்பட்டது.
அந்த நட்பின் வாயிலாக, கருணாநிதியின் பி.எஸ்.சி படித்த மனைவி நித்தியா கல்யாணிக்கு வேலை வாங்கித் தர திட்டமிட்டார். இதை அறிந்த தினேஷ், தனது மூலம் மின்வாரியத்தில் வேலை வாங்கி தர முடியும், அதற்கு 10 லட்சம் ரூபாய் செலவும், முன்பணம் 3 லட்சம் ரூபாய் வேண்டும் என்றும் கூறியுள்ளார்.
அதன்படி, 2002ஆம் ஆண்டில் பனகுடி அருகேயுள்ள தனது சொந்த ஊரான தண்டர்குளத்தில் தினேஷுக்கு கருணாநிதி 3 லட்சம் ரூபாய் கொடுத்தார். பணம் கொடுத்தும் பல மாதங்கள் கடந்தும், மனைவிக்கு வேலை கிடைக்காததால் கருணாநிதி தினேஷிடம் தொடர்ந்து கேட்டுக் கொண்டே இருந்தார். ஆனால் அவர் வேலை வாங்கிக் கொடுக்காமல், பணத்தையும் திருப்பி வழங்காமல் தவிர்த்து வந்துயுள்ளார்.
சமீபத்தில் தினேஷ் வள்ளியூருக்கு வந்திருக்கிறார் என்று அறிந்த கருணாநிதி, அவருக்கு போன் செய்து பணத்தை திருப்பி தருமாறு கேட்டார். பின்னர் தினேஷை ஊருக்கு வெளியே வருமாறு அழைக்கவும் செய்தார். அந்த சந்திப்பில் தினேஷ் கருணாநிதியை கம்பியால் அடித்து தாக்கி, கொலை செய்யும் நோக்கில் காயம் ஏற்படுத்தியுள்ளார்.
இதுகுறித்து கருணாநிதி பனங்குடி போலீசில் புகார் அளித்தார். புகாரின் பேரில் இன்று தினேஷை பனங்குடி போலீசார் கைது செய்து விசாரணை நடத்தி வருகிறார்கள். மேலும், பிக் பாஸ் நிகழ்ச்சியில் தோன்றியிருந்த இந்த துணை நடிகரின் கைது சினிமா வட்டத்தில் பெரும் பரபரப்பை ஏற்படுத்தியுள்ளது.
