கொழும்பு: இலங்கையில் நடைபெற்று வரும் 2026 டி20 உலகக்கோப்பைத் தொடரில், நமீபியா அணிக்கு எதிரான முக்கியமான போட்டியில் 102 ரன்கள் வித்தியாசத்தில் வெற்றி பெற்ற பாகிஸ்தான் அணி, சூப்பர் 8 சுற்றுக்கு முன்னேறியுள்ளது.
பாகிஸ்தானின் இமாலய இலக்கு:
கொழும்புவில் உள்ள எஸ்.எஸ்.சி (SSC) மைதானத்தில் நடைபெற்ற இந்தப் போட்டியில் டாஸ் வென்ற பாகிஸ்தான் அணி முதலில் பேட்டிங்கை தேர்வு செய்தது. தொடக்க வீரர் சாய்ம் அயூப் சீக்கிரம் ஆட்டமிழந்தாலும், மற்றொரு தொடக்க வீரரான சாகிப்சாதா ஃபர்ஹான் நமீபியாவின் பந்துவீச்சை நாலாபுறமும் சிதறடித்தார்.
ஃபர்ஹான் 58 பந்துகளில் 11 பவுண்டரிகள் மற்றும் 4 சிக்ஸர்களுடன் 100 ரன்கள் எடுத்து ஆட்டமிழக்காமல் இருந்தார். அவருக்கு உறுதுணையாக ஆடிய கேப்டன் சல்மான் அலி ஆகா 38 ரன்களும், இறுதியில் அதிரடி காட்டிய ஷதாப் கான் 36 ரன்களும் எடுக்க, பாகிஸ்தான் அணி 20 ஓவர்கள் முடிவில் 199 ரன்களைக் குவித்தது.
அதிரடி மாற்றங்கள் பலன் அளித்தன:
இந்தியாவுக்கு எதிரான முந்தைய போட்டியில் தோல்வியடைந்ததைத் தொடர்ந்து, பாகிஸ்தான் அணியில் அதிரடி மாற்றங்கள் செய்யப்பட்டன. சொதப்பலாக ஆடி வந்த ஷாகின் ஷா அப்ரிடி மற்றும் அப்ரார் அகமது நீக்கப்பட்டு, சல்மான் மிர்சா மற்றும் கவாஜா நபாய் ஆகியோர் அணியில் சேர்க்கப்பட்டனர். இந்த மாற்றங்கள் அணிக்கு நல்ல பலனைத் தந்துள்ளன.
நமீபியா சரிவு:
200 ரன்கள் என்ற கடினமான இலக்கை நோக்கி களமிறங்கிய நமீபியா அணி, பாகிஸ்தானின் பந்துவீச்சைத் தாக்குப்பிடிக்க முடியாமல் அடுத்தடுத்து விக்கெட்டுகளை இழந்தது. அந்த அணியில் ஸ்டீன்காம்ப் (25) மற்றும் அலெக்சாண்டர் (20) ஆகிய இருவர் மட்டுமே இரட்டை இலக்க ரன்களை எட்டினர்.
பாகிஸ்தான் தரப்பில் அபாரமாக பந்துவீசிய மர்ம சுழற்பந்து வீச்சாளர் உஸ்மான் தாரிக் 16 ரன்கள் மட்டுமே கொடுத்து 4 விக்கெட்டுகளைக் கைப்பற்றி நமீபியாவின் முதுகெலும்பை உடைத்தார். ஷதாப் கான் 3 விக்கெட்டுகளை வீழ்த்தினார். இதன் மூலம் நமீபியா அணியால் 20 ஓவர்களில் 97 ரன்கள் மட்டுமே எடுக்க முடிந்தது.
இந்த வெற்றியின் மூலம் பாகிஸ்தான் அணி சூப்பர் 8 சுற்றுக்குத் தகுதி பெற்றதோடு, டி20 உலகக்கோப்பை வரலாற்றில் ரன்கள் அடிப்படையில் தனது மிகப்பெரிய வெற்றியையும் பதிவு செய்துள்ளது. சதம் விளாசிய சாகிப்சாதா ஃபர்ஹான் ஆட்டநாயகனாகத் தேர்ந்தெடுக்கப்பட்டார்.
