இந்திய கிரிக்கெட் உலகில் நீண்டநாளாக நிலவி வந்த ஒரு பெரிய சஸ்பென்ஸுக்கு தற்போது முடிவு கிடைத்துள்ளது. 2027 உலகக்கோப்பை அணிகளில் இடம்பெற இந்திய கிரிக்கெட்டின் இரண்டு ஜாம்பவான்களான விராட் கோலியும் ரோகித் சர்மாவும் உள்நாட்டு போட்டிகளில் விளையாட வேண்டும் என்ற பிசிசிஐயின் அதிரடி உத்தரவுக்கு, இப்போது கிங் கோலியும் சம்மதம் தெரிவித்துள்ளார்.
இந்த செய்தி கிரிக்கெட் ரசிகர்களிடையே பெரும் கொண்டாட்டத்தை உருவாக்கியுள்ளது. முதலில் என்ன நடந்தது? டெஸ்ட் மற்றும் டி20 கிரிக்கெட்டில் இருந்து ஓய்வு பெற்ற கோலியும் ரோகித்தும் தற்போது ஒருநாள் போட்டிகளில் மட்டுமே விளையாடி வருகின்றனர்.
இதனால், 2027 உலகக்கோப்பை வரை அவர்களுக்கு போதுமான போட்டி அனுபவம் கிடைக்குமா என்ற கேள்வி எழுந்தது. இதற்காக, உலகக்கோப்பை திட்டத்தில் சேர வேண்டுமெனில் விஜய் ஹசாரே டிரோபி போன்ற உள்நாட்டு ஒருநாள் தொடர்களில் கண்டிப்பாக விளையாட வேண்டும் என்று பிசிசிஐ ஒரு நிபந்தனை வைத்தது.
இந்த உத்தரவுக்கு ரோகித் சர்மா சில வாரங்களுக்குமுன்பே சம்மதம் தெரிவித்து, மும்பை அணிக்காக விளையாடத் தயாராக இருப்பதாக கூறிவிட்டார். ஆனால் கிங் கோலியின் முடிவு என்னவாக இருக்கும் என்ற கேள்வி தொடர்ந்தது.
இப்போது அந்த சஸ்பென்ஸ் நீங்க, கோலியும் விஜய் ஹசாரே தொடரில் விளையாட ஒப்புக்கொண்டுள்ளதாக டைம்ஸ் ஆப் இந்தியா செய்தி வெளியிட்டுள்ளது. அவர்களின் அறிக்கையின்படி, தென்னாப்பிரிக்காவுக்கு எதிரான ஒருநாள் தொடர் முடிந்ததும் கோலி லண்டனுக்கு செல்ல திட்டமிட்டிருந்தாலும், பின்னர் அதனை மாற்றி பெங்களூருவிற்கு திரும்பி டெல்லி அணிக்காக சில போட்டிகளில் விளையாட திட்டமிட்டுள்ளார்.
அவர் எப்போது திரும்புவார் என்பது இன்னும் உறுதியான தகவல் இல்லாதபோதிலும், உள்நாட்டு போட்டிகளில் விளையாட மனதளவில் முழுமையாக தயார் நிலையில் இருப்பதாக கூறப்படுகிறது. இந்த முடிவுக்குப் பின்னால் ஒரு பெரிய அழுத்தமும் இருந்ததாக தகவல்கள் தெரிவிக்கின்றன.
தேர்வுக்குழு தலைவர் அஜித் அகர்கர், ரோகித் மற்றும் கோலியின் ஃபிட்னஸ் அல்லது ஃபார்மில் சிறிய குறைவு ஏற்பட்டாலும் அணியிலிருந்து நீக்கத் தயார் நிலையில் உள்ளதாகவும், இதைப் புரிந்து கொண்ட இந்த இரண்டு ஜாம்பவான்களும் தங்களது இடத்தை உறுதிப்படுத்த உள்நாட்டு போட்டிகளில் விளையாட முடிவு செய்துள்ளதாகவும் அறிக்கைகள் கூறுகின்றன.
மொத்தத்தில், பல ஆண்டுகளுக்கு பிறகு இந்திய கிரிக்கெட்டின் இரண்டு மிகப்பெரிய நட்சத்திரங்கள் ஒரே நேரத்தில் உள்நாட்டு போட்டிகளில் களமிறங்க உள்ளனர். இது இளம் வீரர்களுக்கு பெரிய ஊக்கமாகவும், ரசிகர்களுக்கு ஒரு மெகா விருந்தாகவும் அமைய உள்ளது.
