வங்கதேசத்தில் கடந்த ஒன்றரை ஆண்டுகளாக நிலவி வந்த அரசியல் குழப்பங்களுக்குப் பிறகு, தாரிக் ரஹ்மான் தலைமையிலான புதிய அரசு அண்மையில் பொறுப்பேற்றுள்ளது. இந்த நிலையில், வங்கதேச அதிபர் முகமது சஹாபுதீன், முன்னாள் இடைக்கால அரசுத் தலைவர் மற்றும் நோபல் பரிசு பெற்ற முகமது யூனுஸ் மீது சுமத்தியுள்ள குற்றச்சாட்டுகள் அந்நாட்டில் பெரும் அரசியல் புயலை ஏற்படுத்தியுள்ளது.
அரசியலமைப்புச் சட்டத்தை மீறிய முகமது யூனுஸ்?
வங்கதேசத்தின் ‘காலெர் காந்தோ’ (Kaler Kantho) நாளிதழுக்கு அளித்துள்ள சிறப்பு நேர்காணலில், அதிபர் முகமது சஹாபுதீன் பல அதிர்ச்சிகரமான தகவல்களைப் பகிர்ந்துள்ளார். ஒரு நாட்டின் தலைவராகத் தனக்கு வழங்கப்பட்டுள்ள அரசியலமைப்பு உரிமைகளை முகமது யூனுஸ் திட்டமிட்டுப் பறித்ததாக அவர் குற்றம் சாட்டியுள்ளார்.
“அரசியலமைப்புச் சட்டத்தின்படி, நாட்டின் முக்கிய முடிவுகள் மற்றும் சர்வதேச ஒப்பந்தங்கள் குறித்து அதிபருக்குத் தெரிவிக்க வேண்டியது அரசின் கடமையாகும். ஆனால், முகமது யூனுஸ் தனது ஒன்றரை ஆண்டு கால ஆட்சியில் 15 முறை வெளிநாட்டுப் பயணங்களை மேற்கொண்டார். ஒருமுறை கூட அவர் என்னைச் சந்திக்கவில்லை, எனது அனுமதியைப் பெறவில்லை, பயண விவரங்களை எழுத்துப்பூர்வமாகவும் தெரிவிக்கவில்லை. இது அரசியலமைப்புச் சட்டத்தை வெளிப்படையாக மீறும் செயலாகும்” என்று அதிபர் சஹாபுதீன் தெரிவித்துள்ளார்.
அதிபர் மாளிகையில் சிறை வைக்கப்பட்டாரா?
தன்னை ஒரு ‘அரண்மனை கைதி’யைப் போலவே யூனுஸ் நிர்வாகம் நடத்தியதாக அதிபர் வேதனை தெரிவித்துள்ளார். தான் மேற்கொள்ளவிருந்த கத்தார் மற்றும் கொசோவோ நாடுகளுக்கான அரசுமுறைப் பயணங்களை யூனுஸ் அரசு வேண்டுமென்றே தடுத்ததாக அவர் கூறியுள்ளார்.
மேலும், சுமார் 133 அவசரச் சட்டங்களை (Ordinances) பிறப்பித்த போதும், அமெரிக்கா போன்ற நாடுகளுடன் முக்கிய ஒப்பந்தங்களைச் செய்த போதும், நாட்டின் அதிபரான தனக்கு எந்தத் தகவலும் தெரிவிக்கப்படவில்லை என்று அவர் குறிப்பிட்டுள்ளார். முந்தைய காலங்களில் இருந்த பிரதமர்கள் அனைவரும் சிறிய விஷயமாக இருந்தாலும் அதிபரிடம் கலந்தாலோசிக்கும் வழக்கத்தைக் கொண்டிருந்தனர், ஆனால் யூனுஸ் அந்த மரபை உடைத்துவிட்டதாக அவர் சாடியுள்ளார்.
பதவி பறிப்பு சதி மற்றும் ராணுவத்தின் பாதுகாப்பு
தன்னைப் பதவியிலிருந்து நீக்கிவிட்டு, ஒரு முன்னாள் தலைமை நீதிபதியை அந்த இடத்தில் அமர வைக்க முகமது யூனுஸ் தரப்பு ரகசியமாகச் சதி செய்ததாக அதிபர் பகீர் குற்றச்சாட்டை முன்வைத்துள்ளார். ஆனால், அந்த நீதிபதி இதற்கு உடன்பட மறுத்ததால் அந்த முயற்சி தோல்வியடைந்ததாக அவர் கூறினார்.
குறிப்பாக, 2024 அக்டோபர் 22 அன்று அதிபர் மாளிகையை (பங்கபவன்) போராட்டக்காரர்கள் சூழ்ந்தபோது, அது ஒரு பயங்கரமான இரவாக இருந்ததாக அவர் நினைவு கூர்ந்தார். அந்தச் சமயத்தில், வங்கதேச ராணுவம் மற்றும் தாரிக் ரஹ்மான் தலைமையிலான பிஎன்பி (BNP) கட்சி ஆகியவை தனக்கு உறுதுணையாக நின்றதாக அவர் கூறினார். ராணுவத் தளபதிகள் தன்னிடம் வந்து, “நீங்கள் எங்கள் முப்படைகளின் உச்சகட்டத் தளபதி. உங்கள் தோல்வி என்பது ராணுவத்தின் தோல்வி. எக்காரணம் கொண்டும் உங்களைப் பாதுகாப்போம்” என்று உறுதியளித்ததையும் அவர் சுட்டிக்காட்டினார்.
வங்கதேசத்தில் மீண்டும் ஜனநாயகம் நிலைநாட்டப்பட்டுள்ள இந்தச் சூழலில், அதிபரின் இந்தப் புகார்கள் முகமது யூனுஸின் நற்பெயருக்குப் பெரும் சவாலாக மாறியுள்ளது.
