ரஜினிகாந்தின் 173வது படத்திலிருந்து இயக்குநர் சுந்தர்சீ விலகிய நிலையில், தனது நட்சத்திரத்துக்குப் பிடிக்கும் வரை தொடர்ந்து கதை கேட்டு வருவதாக கமல்ஹாசன் விளக்கம் அளித்துள்ளார். ரஜினி மற்றும் கமலுக்கு அருணாச்சலம், அன்பே சிவம் போன்ற கிளாசிக் படங்களை அளித்தவர் இயக்குநர் சுந்தர்சீ.
கடந்த வாரம், ரஜினிகாந்த்–கமல்ஹாசன்–சுந்தர்சீ கூட்டணியில் புதிதாக படம் உருவாக உள்ளதாக அறிவிப்பு வெளியாகி, ரசிகர்களை உற்சாகத்தில் ஆழ்த்தியது. கமல்ஹாசனின் ராஜ்கமல் ஃபிலிம்ஸ் தயாரிப்பில், சுந்தர்சீ இயக்கத்தில், ரஜினிகாந்தின் 173வது படம் 2027ஆம் ஆண்டு பொங்கலை முன்னிட்டு வெளியாகும் என்றும் படக்குழு வீடியோ வெளியிட்டது.
இந்நிலையில், ரஜினிகாந்த்–கமல்ஹாசன் படத்தில் இருந்து தாம் விலகுவதாக சுந்தர்சீ அதிர்ச்சித் தகவலை வெளியிட்டார். ‘‘தவிர்க்க முடியாத சூழ்நிலை காரணமாக, கனத்த மனதுடன் ரஜினி 173 படத்தில் இருந்து விலகுகிறேன். கமல் தயாரிப்பில் ரஜினியை இயக்குவது என் வாழ்க்கையின் பெரிய கனவாக இருந்தாலும், அவர்களின் வழிகாட்டுதல்களை தொடர்ந்தும் பெறுவேன்’’ என சுந்தர்சீ அறிவிப்பு வெளியிட்டார்.
சுந்தர்சீ விலகியதற்கான காரணங்கள் குறித்து சமூக வலைதளங்களில் பல்வேறு கிசுகிசுக்கள் பரவிய நிலையில், உண்மையான காரணத்தை கமல்ஹாசன் விளக்கியுள்ளார்.
“என் கருத்து — நான் முதலீடு செய்தாலும், என் நட்சத்திரத்துக்கு பிடித்த கதையைத் தேர்வு செய்வதே ஆரோக்கியமான நடைமுறை. அவருக்குப் பிடிக்கும் வரைக்கும் நாங்கள் கதை கேட்டுக்கொண்டே இருக்கிறோம்,” என்று கூறினார்.
அடுத்து, ரஜினியுடன் இணைந்து நடிக்கும் படம் குறித்து கேட்கப்பட்ட கேள்விக்கும் அவர் பதிலளித்தார்:
“நாங்கள் இன்னொரு கதையைத் தேடி வருகிறோம். இப்போதைக்கு இதுவரை செய்திருப்பது இதுதான். இந்த மாதிரி கதைகள் — எதிர்பாராததை எதிர்பாருங்கள்.” இந்நிலையில், இந்த இரு படங்களையும் இயக்கப் போவது யார் என்பது குறித்து ரஜினி மற்றும் கமல் ரசிகர்களிடையே எதிர்பார்ப்பு அதிகரித்து வருகிறது.
