இந்திய குடியரசின் அடுத்த துணைத்தலைவர் யார் என்பதற்கான தேர்தல் இன்று காலை 10 மணி முதல் டெல்லி நாடாளுமன்ற வளாகத்தில் தொடங்கியுள்ளது. மாலை 5 மணி வரை வாக்குப்பதிவு நடைபெறுகிறது.
இந்த தேர்தலில் மக்களவை, மாநிலங்களவை உறுப்பினர்கள் அனைவரும் பங்கேற்கின்றனர். மாநிலங்களவை பரிந்துரைக்கப்பட்ட உறுப்பினர்களும் வாக்களிக்கும் உரிமை பெற்றுள்ளனர். இதற்கான விரிவான ஏற்பாடுகள் நாடாளுமன்ற வளாகத்தில் செய்யப்பட்டிருந்தன. வாக்களிக்கும் முறையை விளக்கும் வகையில் முன்பே ஒத்திகையும் நடத்தப்பட்டது.
பிரதமர் நரேந்திர மோடி உள்பட பலரும் வாக்கு பதிவு செய்ய வந்துள்ளனர். மாலை 6 மணி முதல் வாக்கு எண்ணிக்கை தொடங்கி, அதே இரவு முடிவுகள் அறிவிக்கப்படும் எனத் தேர்தல் ஆணையம் தெரிவித்துள்ளது.
மொத்தம் 781 உறுப்பினர்களில் 6 காலியிடங்கள் உள்ளதால் 775 பேர் வாக்களிக்க வாய்ப்பு உள்ளது. வெற்றி பெற குறைந்தபட்சம் 391 வாக்குகள் தேவைப்படுகிறது.
இந்த நிலையில், தேசிய ஜனநாயக கூட்டணியின் (NDA) வேட்பாளர் சிபி ராதாகிருஷ்ணன் 437 வாக்குகள் பெற்று வெற்றி பெறுவார் என மதிப்பீடு செய்யப்படுகிறது. அவர் சுமார் 56% வாக்குகளை பெறுவார் என்று எதிர்பார்க்கப்படுகிறது. எதிர்க்கட்சிகளின் சார்பில் போட்டியிடும் உச்ச நீதிமன்ற முன்னாள் நீதிபதி சுதர்சன் ரட்டி சுமார் 323 வாக்குகளை பெறுவார் என கணிக்கப்படுகிறது.
மக்களவையில் NDA-விற்கு 299 எம்பிக்கள், மாநிலங்களவையில் 129 உறுப்பினர்கள் ஆதரவாக உள்ளனர். எதிர்க்கட்சிகளுக்கு மொத்தம் 315 எம்பிக்கள் உள்ளனர்.
இந்நிலையில், பிஜூ ஜனதா தளம், பாரத ராஷ்டிர சமிதி (BRS), சிவமணி காலிதளம் உள்ளிட்ட சில கட்சிகள் வாக்களிப்பிலிருந்து விலகி இருப்பதாகத் தகவல்கள் தெரிவிக்கின்றன.
இதன் காரணமாக வாக்கு எண்ணிக்கையில் நெருக்கடி குறைய வாய்ப்பு அதிகம். மாலையே இந்தியாவின் அடுத்த துணைத்தலைவர் யார் என்பது தெளிவாகும்.
