“நேரு பிறந்த நாளை ஏன் குழந்தைகள் தினமாக கொண்டாடுகிறோம் தெரியுமா?”

குழந்தைகளின் கல்வி, பாதுகாப்பு மற்றும் நலனைக் கட்டியெழுப்பும் நோக்கத்தில் கொண்டாடப்படும் குழந்தைகள் தினம், இந்தியாவில் ஒவ்வொரு ஆண்டும் நவம்பர் 14 ஆம் தேதி சிறப்பாகக் கொண்டாடப்படுகிறது. இந்தியாவின் முதல் பிரதமர் பண்டித ஜவஹர்லால் நேரு அவர்களின் பிறந்தநாள் என்பதாலேயே இந்த தேதி தேர்வு செய்யப்பட்டது. குழந்தைகளிடம் கொண்டிருந்த அன்புக்காக அவர்கள் “நேரு மாமா” என்று அழைக்கப்பட்டு வந்தார்.

சுதந்திர இந்தியாவில் குழந்தைகளுக்கான கல்வி, ஆரோக்கியம், உணவு பாதுகாப்பு போன்ற துறைகளில் நேரு முக்கிய பங்காற்றினார். 1948ல் குழந்தைகள் நலக் குழு (ICCW) உருவாக்கப்பட்டதிலும் அவர் முன்னிலையில் இருந்தார். பள்ளிகள், நூலகங்கள், குழந்தைகள் இல்லங்கள் உள்ளிட்ட பல அமைப்புகள் அவரது முயற்சியால் வளர்ச்சி பெற்றன.
முதலில் இந்தியாவில் குழந்தைகள் தினம் நவம்பர் 20 (UN Children’s Day) அன்று கடைப்பிடிக்கப்பட்டது. ஆனால் நேருவின் மறைவிற்குப் பிறகு, 1964 முதல் அவரது பிறந்தநாள் அதிகாரப்பூர்வமாக குழந்தைகள் தினமாக அறிவிக்கப்பட்டது.

மாணவர்களின் திறமைகளை ஊக்குவிக்கும் நோக்கில் இன்று நாட்டின் பல்வேறு பள்ளிகளில் கலாச்சார நிகழ்ச்சிகள், கலைப் போட்டிகள், உரையாற்றல்கள், விழிப்புணர்வு நிகழ்வுகள் நடைபெற்று வருகின்றன. குழந்தைகள் பாதுகாப்பு மற்றும் கல்வி சமத்துவம் குறித்த விழிப்புணர்வை ஏற்படுத்தும் வகையில் மாநில அரசுகள் சிறப்பு திட்டங்களையும் நிறைவேற்றுகின்றன.

உலகளவில் குழந்தைகளின் நலனை முன்னிறுத்தும் நோக்கில், ஐக்கிய நாடுகள் அமைப்பு (UN) 1954ல் “Universal Children’s Day”யை உருவாக்கியது. அதன் அதிகாரப்பூர்வ தேதி நவம்பர் 20 என்றும் நிர்ணயிக்கப்பட்டது. 1959ல் குழந்தைகள் உரிமைகள் பிரகடனம் (Declaration of the Rights of the Child) வெளியிடப்பட்டதும் இந்த நாளுடன் தொடர்புடைய முக்கிய நிகழ்வாகும்.
அமெரிக்கா, இங்கிலாந்து, ஜப்பான், பாகிஸ்தான் உள்ளிட்ட பல நாடுகள் தங்களது கலாச்சார மற்றும் வரலாற்று சூழல்களுக்கு ஏற்ப குழந்தைகள் தினத்தை வெவ்வேறு தேதிகளில் கொண்டாடுகின்றன.

சமூக ஆர்வலர்கள் கூறுவதாவது, “குழந்தைகள் தினம் வெறும் கொண்டாட்ட நாள் மட்டுமல்ல; குழந்தை தொழிலிலிருந்து பாதுகாத்தல், உடல்-மனநலம் காக்குதல், தரமான கல்வி அளித்தல், பாலின சமத்துவத்தை உறுதி செய்தல் போன்ற முக்கிய கோட்பாடுகளை நினைவூட்டும் நாளாகும்.”