இந்தியா–அமெரிக்கா உறவில் சில விரிசல்கள் ஏற்பட்டுள்ளதாக பேசப்பட்டு வந்த சூழ்நிலையில், அந்த அனைத்து ஊகங்களுக்கும் முற்றுப்புள்ளி வைக்கும் வகையில் இந்தியா ஒரு மெகா ராணுவ ஒப்பந்தத்தில் கையெழுத்திட்டுள்ளது.
இந்திய கடற்படையின் வலிமையை பல மடங்கு அதிகரிக்கும் இந்த ஒப்பந்தத்தின் மதிப்பு சுமார் ரூ. 8,000 கோடி. இப்போது இந்த ஒப்பந்தத்தின் முழு விவரங்களைப் பார்ப்போம். சமீபத்தில் அமெரிக்க அதிபர் டொனால்ட் டிரம்ப் இந்திய பொருட்களுக்கு 50% வரி விதித்ததால், இரு நாடுகளுக்கும் இடையில் ஒரு வகையான பதட்டம் நிலவி வந்தது.
ஆனால் அதை எல்லாம் தாண்டி, தற்போது இந்தியா அமெரிக்காவுடன் மிகப்பெரிய மற்றும் மிக முக்கியமான ராணுவ ஒப்பந்தத்தை செய்து உள்ளது. இது, இந்திய கடற்படையில் உள்ள 24 ‘சீஹாக்’ ஹெலிகாப்டர்களுக்கான அடுத்த ஐந்து ஆண்டுகளுக்கான உதிரிப் பாகங்கள், பராமரிப்பு மற்றும் தொழில்நுட்ப ஆதரவை வழங்குவதற்கான ஒப்பந்தமாகும்.
இந்த ஹெலிகாப்டர்களின் முழுப்பெயர் MH-60R Seahawk. இவற்றை அமெரிக்காவின் புகழ்பெற்ற லாக்ஹீட் மார்டின் நிறுவனம் தயாரிக்கிறது.
இந்த சீஹாக் ஹெலிகாப்டரில் என்ன சிறப்பு?
இது எல்லா வகையான வானிலைகளிலும் இயங்கக்கூடிய அதிநவீன ஹெலிகாப்டர். கடலுக்கடியில் பதிந்திருக்கும் எதிரி நாட்டு நீர்மூழ்கிக் கப்பல்களை கண்டறிந்து தாக்கி அழிக்கும் திறன் கொண்டது. இவ்விமானத்தில் உள்ள அதிநவீன சென்சார்கள் மற்றும் கருவிகள், கடலில் இந்தியாவின் கண்காணிப்பு திறனை அடுத்த கட்டத்திற்கு உயர்த்துகின்றன.
இந்த ஒப்பந்தத்தின் ஒரு பகுதியாக, இந்த ஹெலிகாப்டர்களை பழுது பார்க்கவும் பராமரிக்கவும் தேவையான வசதிகள் இந்தியாவிலேயே அமைக்கப்படும். இது நமது ‘ஆத்மநிர்பர்’ முயற்சிக்கு பெரிய ஊக்கமாக இருக்கும்.
எதிர்காலத்தில் இந்த ஹெலிகாப்டர்கள் பராமரிப்புக்காக நாம் அமெரிக்காவை சார்ந்து இருக்க வேண்டியதில்லை. மேலும் இந்த வசதிகளால் நமது உள்நாட்டு சிறு, குறு மற்றும் நடுத்தர நிறுவனங்களுக்கும் புதிய வாய்ப்புகள் உருவாகும்.
இந்த ஒப்பந்தம், இந்தியாவின் கடல்சார் பாதுகாப்பை மேலும் வலுப்படுத்தும் முக்கியமான ஒரு நகர்வாகக் கருதப்படுகிறது. சீனா இந்தியப் பெருங்கடலில் தனது ஆதிக்கத்தை நிலைநாட்ட முயற்சித்து வரும் இந்த சூழ்நிலையில், இந்த சீஹாக் ஹெலிகாப்டர்கள் இந்திய கடற்படைக்கு பெரிய பலமாக அமையும்.
