திருச்சி தென்னூர் பகுதியில் உள்ள தனியார் மருத்துவமனையில் தவறான சிகிச்சை அளித்ததால் குழந்தை பிறந்து நான்கு நாட்களில் தாய் உயிரிழந்ததாக உறவினர்கள் குற்றம்சாட்டி, மருத்துவமனை முன்பு முற்றுகை போராட்டத்தில் ஈடுபட்டு வருகின்றனர்.
திருச்சி புத்தூர் நான்கு ரோடு பகுதியில் பிரபலமான “ஜெனட்” என்ற தனியார் மகப்பேறு மருத்துவமனை இயங்கி வருகிறது. இங்கு மகப்பேறு மற்றும் குழந்தைகள் தொடர்பான சிகிச்சைகள் வழங்கப்படுகின்றன.
லால்குடி நகர் பகுதியைச் சேர்ந்த ஜான்சன்–ஜெயராணி தம்பதியினர் கடந்த ஆறு ஆண்டுகளாக குழந்தை பெற முடியாததால், புத்தூர் நான்கு ரோடு பகுதியில் உள்ள ஜெனட் மருத்துவமனையில் சிகிச்சை பெற்று வந்துள்ளனர்.
அதன் பின்னர், ஜெயராணி கடந்த ஒன்பது மாதங்களுக்கு முன்பு கர்ப்பம் தரித்தார். மருத்துவர்கள் அவருக்கு குழந்தை பிறப்பதற்கான தேதியை அடுத்த மாதம் 1 ஆம் தேதி என குறிப்பிடினர்.
இதன்படி, ஜெயராணி இந்த மாதம் 1 ஆம் தேதி மருத்துவமனையில் அனுமதிக்கப்பட்டார். மூன்றாம் தேதி அவருக்கு சிசேரியன் அறுவைச் சிகிச்சை நடத்தப்பட்டது.
அந்த அறுவைச் சிகிச்சையின் மூலம் ஆண் குழந்தை பிறந்தது. குழந்தை நலமாக இருந்தாலும், ஜெயராணி கடந்த சில நாட்களாக உணவு அருந்தாமல், உடல்நலம் பாதிக்கப்பட்ட நிலையில் சிகிச்சையில் இருந்ததாக கூறப்படுகிறது.
இதையடுத்து, உறவினர்கள் மருத்துவமனை மருத்துவர் விக்டோரியாவிடம் காரணம் கேட்டபோது, அவர் அளித்த பதில்கள் முன்–பின் முரண்பட்டதாக கூறப்படுகிறது. “குழந்தை பிறந்த மூன்று நாட்களுக்குள் தாய்க்கு கஞ்சி, சாதம் போன்ற இலகுவான உணவு கொடுக்க வேண்டும், ஆனால் ஏன் கொடுக்கவில்லை?” என்று உறவினர்கள் கேட்டுள்ளனர்.
பின்னர் ஜெயராணிக்கு வயிற்றுவலி ஏற்பட்டதால், உறவினர்கள் அவரை மற்றொரு மருத்துவமனைக்கு மாற்ற அனுமதி கேட்டனர். அதன்படி, திருச்சி கண்டோன்மெண்ட் பகுதியில் உள்ள கேஎம்சி மருத்துவமனைக்கு மாற்றப்பட்டார்.
அங்கு பரிசோதித்த மருத்துவர்கள், “முதலில் சிசேரியன் அறுவைச் சிகிச்சை செய்யும்போது மலக்குடலுக்கு கத்தி பட்டதால், மலக்குடல் வழியாக இரத்தம் கலந்துள்ளது” என்று தெரிவித்தனர். அவர்கள் வயிற்றில் உள்ள அழுக்குநீரை அகற்றியிருந்தாலும், நிலைமை மோசமாக இருந்ததாக கூறப்படுகிறது.
இவ்வாறு கடுமையான நிலைமையில் இருந்த ஜெயராணி இறந்துவிட்டார். இதற்கு பொறுப்பு புத்தூர் நான்கு ரோடு ஜெனட் மருத்துவமனைக்கே என்று கேஎம்சி மருத்துவர்கள் தெரிவித்ததாக உறவினர்கள் கூறுகின்றனர்.
இதையடுத்து, ஜெயராணியின் உடலை பெற மறுத்து, உறவினர்கள் திருச்சி அரசு தலைமை மருத்துவமனை மற்றும் ஜெனட் மருத்துவமனை முன்பு போராட்டத்தில் ஈடுபட்டனர்.
“ஜெயராணி மரணத்திற்கு காரணமான ஜெனட் மருத்துவமனைக்கு எதிராக உரிய நடவடிக்கை எடுக்க வேண்டும்” என்று கோரிய அவர்கள், “ஒவ்வொரு ஆண்டும் இம்மருத்துவமனையில் இதுபோன்ற தாய் அல்லது குழந்தை மரணங்கள் நடப்பதாக” குற்றம்சாட்டினர்.
தற்போது 100க்கும் மேற்பட்டோர் போராட்டத்தில் ஈடுபட்டு வருகிறார்கள். இதையடுத்து காவல்துறையினர் இடத்தில் முகாமிட்டு பேச்சுவார்த்தை நடத்தி வருகின்றனர்.
