சென்னையில் தொடரும் வாக்காளர் திருத்த முகாம்: படிவப் பூர்த்தி சந்தேகங்களுக்கு உடனடி உதவி

சென்னையில் வாக்காளர் பட்டியல் சிறப்பு தீவிர திருத்த பணியில் வாக்காளர்களுக்கு உதவ நான்காம் நாளாக சிறப்பு முகாம் நடைபெற்று வருகிறது. தேவையான இடங்களில் கூடுதலாக வாக்குச்சாவடி நிலை அலுவலர்கள் நியமிக்கப்பட்டுள்ளனர்.

இன்று சென்னையில் நான்காவது நாளாக வாக்காளர் உதவி மையங்கள் செயல்பட்டு வருகின்றன. சென்னையின் 16 சட்டமன்றத் தொகுதிகளில் 947 இடங்களில் இந்த வாக்காளர் உதவி மையங்கள் அமைக்கப்பட்டுள்ளன. வாக்காளர்களுக்கு படிவங்கள் பூர்த்தி செய்வதில் ஏற்படும் சந்தேகங்களை தீர்க்கவும், பூர்த்தி செய்யப்பட்ட விண்ணப்பங்களைப் பெறவும் இம்மையங்கள் உதவி செய்து வருகின்றன.

இன்று நான்காவது நாளாகியும், இந்த உதவி மையங்களுக்கு பொதுமக்கள் அதிக அளவில் வருகை தரும் நிலை தொடர்கிறது. பொதுமக்களிடம் பேசினபோது:

வாக்காளர்: “படிவங்களை எல்லாம் பூர்த்தி செய்து கொடுத்துவிட்டேன். சிறிது அலைச்சல் தவிர பிரச்சனை ஏதும் இல்லை. அனைத்தையும் முடித்துவிட்டேன்.”

அலுவலர்: “பெரும்பாலும் 2002–2005 காலப்பகுதியில் பெயர் இருந்ததா என்று மக்கள் கேட்கிறார்கள். பெயர் பட்டியலில் இருந்தால் அதை உறுதி செய்கிறோம்; இல்லையெனில் ஆன்லைனில் சரிபார்த்து தேவையான தகவலை வழங்குகிறோம். சிலருக்கு 2005-ஆம் ஆண்டுக்கான விவரங்கள் கிடைக்காததால் படிவங்களை பூர்த்தி செய்ய முடியாமல் தவிப்பும் இருக்கிறது.”

வாக்காளர்: “இன்னும் படிவம் கொடுக்கவில்லை. என்னுடைய முகவரி 2000-ல் எங்கு இருந்தது என்பதைச் சொல்வது தேவையாம். அதனால் T. Nagar-ல் இருந்த வீட்டுக்குச் சென்று அங்கு தகவல் எடுத்து வரச் சொல்லியிருக்கிறார்கள். அதை எடுத்துவந்த பிறகே படிவத்தை முழுமையாக பூர்த்தி செய்து கொடுக்க வேண்டும்.”

பலருக்கும் “2005-ஆம் ஆண்டில் அவர்கள் எங்கு வாக்கு போட்டார்கள்?”, அந்தத் தகவல் இல்லையென்றால் படிவம் நிராகரிக்கப்படுமா?” என்ற கவலைகள் இருந்தன. அதற்கு அலுவலர்கள் விளக்கமாக:

அலுவலர்: “எந்தக் காலத்துக்கான தகவலும் இல்லாதிருந்தாலும் மேலே உள்ள முக்கியப் பகுதிகளை பூர்த்தி செய்தால் போதுமானது. அது நிராகரிக்கப்படாது. பிறந்த தேதி, ஆதார் எண், தொலைபேசி எண், பெற்றோர்/கணவர் பெயர் போன்றவற்றை எழுதினாலே படிவம் ஏற்கப்படும்.” படிவங்களை தினசரி பதிவேற்றம் செய்யும் பணியில் உள்ள சிரமங்களைப் பற்றி கேட்டபோது:

அலுவலர்: “மாநகராட்சி கூடுதல் பணியாளர்களை நியமித்துள்ளது. தற்போது படிவங்கள் அதே நாளில் தரவுத்தளத்தில் பதிவேற்றம் செய்யப்படுகின்றன. சில இடங்களில் சர்வர் சிக்கல் இருந்ததால் மொபைல் மூலம் பதிவேற்றம் செய்ய வேண்டிய நிலை இருந்தது. அதைத் தீர்க்க கூடுதல் பணியாளர்கள் நியமிக்கப்பட்டுள்ளனர்.”

மொத்தத்தில், வாக்காளர் பட்டியல் சிறப்பு திருத்த பணியில் மக்கள் சந்திக்கும் 2005-ஆம் ஆண்டு வாக்கு தொடர்பான தகவல் குழப்பங்கள், படிவப் பூர்த்தி சந்தேகங்கள் போன்றவை இம்மையங்களில் தீர்க்கப்பட்டு வருகின்றன. மேலும் தரவு பதிவேற்ற பணியை விரைவுபடுத்த புதிய நடவடிக்கைகளையும் சென்னை மாநகராட்சி மேற்கொண்டுள்ளது.